Governu Timor-Leste Tenke Aproveita Selebrasaun Tinan 20 Referendum atu Husu Liberdade ba Bernard Collaery ho “Witness K”

MOVIMENTU KONTRA OKUPASAUN TASI TIMOR

(MKOTT)

Dili, 02 July 2019

Komunikadu Imprensa

                                                                                                                                

Governu Timor-Leste Tenke Aproveita Selebrasaun Tinan 20 Referendum atu Husu Liberdade ba Bernard Collaery ho “Witness K”

Movimentu Kontra Okupasaun Tasi Timor, MKOTT, hakarak kongratula Governu Timor-Leste ne’ebé deklara ona, liu husi ninia Chefe Negosiador ba Fronteira Marittima Maun Boot Kayrala Xanana Gusmão, atu ratifika tratadu fronteira Marittima ho Australia iha loron-30 fulan-Agostu tinan-2019. MKOTT haksolok tanba MKOTT ezije dala barak ona atu Parlamentu Federal Australia no Parlamentu Nasionál Timor-Leste ratifika tratadu ne’ebé asina tiha ona iha fulan-Marsu tinan-2018.

Luta naruk ida ne’ebé lori ita hotu hamutuk atu atinje, besik daudauk ona. Koinsidensia importante tebtebes ida tanba iha loron hanesan povu Timor-Leste sei selebra aniversariu dala ruanulu loron ne’ebé ema Timor-Leste sira ejerse sira nia devér hodi deside destinu sira nia rain nian.

“MKOTT hakarak husu atu VIII Governu Konstitusionál ho sr. Primeiru Ministru Taur Matan Ruak nia lideransa atu halo buat hotu tuir sira nia podér atu realiza duni deklarasaun ida ne’e” reprezentante MKOTT Portavós hatete.

MKOTT hakarak atu fó-hanoin fila fali ba povu Timor-Leste tomak, katak loron-30 fulan-Agostu tinan-1999 to’o mai ita nia leet tanba ita hotu nia luta iha frente armada, frente klandestina no frente diplomátika. Maibé, MKOTT mós hakarak fó hanoin katak Nasoins Unidas mai hala’o referendum iha Timor-Leste tanba ita mós hetan apoiu husi movimentu solidariedade internasionál sira iha rai barabarak iha mundu ne’e.

Enkuantu povu Timor-Leste tomak prepara an atu ba selebra momentu importante ida ne’e, MKOTT hakarak atu apela ba sr. Primeiru Ministru ho ninia VIII Governu Konstitusionál atu aproveita momentu ida ne’e hodi hato’o povu Timor-Leste nia solidariedade ba ita nia belun boot Sr. Bernard Collaery ho Sr. Witness K ne’ebé oras ne’e daudaun hasoru hela prosesu judisiais no ameasadu tama komarka iha Australia tanba ko’alia lia lós.

Bernard Collaery, advogadu Australianu ida, mós uluk fó kontribuisaun maka’as ba povu Timor-Leste nia luta ba ukun rasik an. Hafoin ukun rasik an, Bernard Collaery hola parte iha ekipa advogadu internasionál ne’ebé reprezenta Timor-Leste iha kazu disputa balu hasoru governu Australia iha tribunal internasionál.

Bernard Collaery nia kliente ida naran Witness K mak ko’alia sai lia lós kona-ba atividades espionajen ne’ebé governu Australia halo hasoru ita nia ekipa negosiador sira durante negosiasaun ba tratadu CMATS iha tinan-2004. Lia lós ida ne’e mak depois governu Timor-Leste kaer nu’udár evidénsia hodi obriga governu Australia ba tur iha meza atu negosia kona-ba fronteira Marittima.

“Bernard Collaery ninia kontribuisaun ba tratadu fronteira Marittima ne’ebé Timor-Leste ho Australia atu ratifika iha loron-30 fulan-Agostu mai ne’e boot tebtebes,” Portavós kontinua.

“Tanba ne’e Estadu no Povu Timor-Leste iha devér atu labele haluha ita nia belun boot ida ne’e. Estadu no Povu Timor-Leste tenke halo buat ruma atu la husik ita nia belun boot Bernard Collaery tama kadeia tanba de’it nia ko’alia lia lós atu defende Timor-Leste nia direitu tuir Lei Internasionál,” portavós MKOTT konklui.

REMATA

Ba informasaun liu tan, halo favor kontaktu: 77432621/maubere81@gmail.com