Mana Ella hakotu is iha Ospitál hafoin hetan asidente karreta soke.

Foto; Mabere

Mana Ella hetan soke husi kontentór ida iha eskola pre primária Sao Carlos nia oin, Tuku 10 dadeer loron kinta feira dia 14 Marsu 2018. Ha’u rasik la haree ho matan asidente ida ne’e, tuir ema konta no hakerek iha media sira katak, Ella atu ba tula nia sobriña/o iha eskola ne’e, kontentór halai husi diresaun kolmera ba Bairopite, derrepente halai sai fali ba dalan ne’ebé la’ós nia diresaun no hodi xoke mana ELLA ate mate bainhira lori too iha ospitál boot.

Ha’u rasik seidauk hatene kondisaun loloos husi kondutór kontentór refere, bainhira xoke, ha’u rona de’it katak, karreta ne’e la’ós kondutór prinsipál mak loris, iha karreta ne’e iha ema na’in tolu inklui kondutór iha karreta oin. Tuir relatóriu polísia nia katak kondutór, Karreta halai maka’as, hakfodak ho karreta ki’ik, nia halai ba mana ne’e ate grave.  Oras ne’e kondutór iha ona sela Polísia, hodi hetan investigasaun no prosesa tuir prosedimentu legal ne’ebé ita iha.

Diskusaun barak sobre kazu hanesan ne’e iha pasadu, ita la aprende husi konsekuénsia sira pasadu nian, hodi evita repetisaun ba hakotu ema nia vida husi asidente similar.

Iha ema barak nia oin mana ELLA monu hela, ema balun prefere hasai foto duke lori lalais nia ba hetan tratamentu, karik ita bele salva ema ne’e nia vida, foto mak fó sai iha media sira sosiál nian, ema barak haree momoos mana ne’e nia oin no monu oinsá, ema balun protesta, loloos ema ho dezastre sira hanesan la bele fó sai nia imajen iha media saida de’it.

Iha kazu balun, se nesesáriu duni fó sai atu ema hatene ka fó informasaun atu ema lao kuidadu liu tan bele halo imajen ho ‘blur’, “kabur/la mós”. Saida mak ita hotu haree imajen iha momentu ne’ebá hasai foto ate prima matebian ne’e nia faru sai husi nia kabun, ema balun dehan, se ita mak iha matebian ne’e nia pozisaun, hakarak hasai ita nia foto ga hakarak hetan tulun lalais? Klaru hakarak salva nia vida, iha fakebook, ema balun hakerek hanesan ne’e, loloos salva ema nia vida mak primeiru depois hasai foto.

Bele ka lae, ema balun bele hasai foto maibé labele publika? Normálmente atu hasai ema ida nia foto, la’ós iha espasu públiku nian, presiza husu lisensa, antes hasai foto no esplika ba sira objetivu husi foto, atu uza ba koleksi privadu ga sei halo publikasaun. Infelizmente, fotógrafu sira, la halo hanesan ne’e dala barak, hasai foto no publika tuir nia hakarak de’it, sein hanoin husi perspetiva ema ne’ebé nia hasai nia foto, nia sei kontente ga sei halo moe nia ga sei halo nia triste, seidauk iha ema barak mak hanoin hanesan ne’e, fiar katak jornalista hotu iha abilidade ida ne’e.

Priima Ella ne’ebé karreta soke iha Bebora, eskola TK-Pre eskolár nia oin, tuir informasaun, lakon ona is ka husik ona mundu real hafoin oras balun hetan tratamentu iha ospitál. Matebian, husi Manatuto Soibada, nia oan feto ikun no feto mesak ida. Matebian ne’e mate ho idade tinan 26.

Hakerek ida ne’e nudár espresaun pesoál ida ba akontesimentu ne’e, nudár espresaun arrepende nia ba ita nia autoridade estadu nia paper atu tau matan ba movimentu transporte sira nia, tau matan ba poténsia sira ne’ebé iha poténsia ba hamosu dezastre ka asidente, infelizmente fatin ne’e, husi loron ba loron, karreta sempre hadau malu atu sai ka liu lalais. ‘blur’. Hakerek ida ne’e, nudár espresaun atu ema sira ne’ebé hasai foto, presiza respeita ema nia privasidade, presiza lalais hanoin atu ajuda ema ho asidente duke hanoin hasai foto atu tau iha públiku.

Matebian husi Soibada tinan 26, nia mesak no ikun husi nia família  

Adeus maluk umanu mana ELLA, deskansa hakmatek iha mundu espirituál. Kondolensia ba família. Abracos!