Pedidu Tau matan ba prosesu justisa ba Sr. Paulino Gama “ Mauk Moruk Teki Timor Lemorai.

FORUM ESTUDANTE MAUBERE

FEM

Karta Aberta ba Prezidente Repúblika RDTL kona-ba Mauk Moruk nia detensaun

Asuntu    : Tau matan ba prosesu justisa ba Sr. Paulino                    Gama “ Mauk Moruk Teki Timor Lemorai.

Dia …/Outubru 2014

Ba dala uluk ami hato’o hakuak boot ba Exelentisimu Prezidente Repúblika ho nia konselleiru tomak iha Palasiu Prezidenzia. Ami nia onra ba ita-boot sira tomak nudár mata dalan ba funu naruk ne’ebé Povu Timor-Leste halo hasoru okupasaun illegal Militár Indonézia durante tinan 24 nia laran. Ho korajen no determinasaun ita-boot sira fila nasaun ne’e sai estadu ida independente no soberanu husi okupante Indonézia, ba ida ne’e merese Timor-oan tomak nia hakruk. Ami mós apresia tebes ba Exelénsia kontinua iha vontade firme no determinasaun atu lori Povu ba moris ida ne’ebé di’ak liu.

Ami hakerek ba Exelénsia iha okaziaun ida ne’e atu informa ba Exelénsia kona-ba situasaun ikus Mauk Moruk nia iha Komarka Bekora ne’ebé loloos la merese ba eis Komandante Mauk Moruk Teki Timor Lemorai. Mauk Moruk iha komarka ho nia kondisaun sofre presaun psikolojia maka’as tanba nia enfrenta todan ne’ebé loloos nia la merese. Mauk Moruk mós sente laiha justisa loloos ba nia tanba kuaze dala tolu ona ba Prokuradoria distritál Dili maibé Porkurador sira nunka hatudu sala boot ne’ebé nia komete hasoru estadu ne’e.

Mauk Moruk hetan kapturasaun iha dia 15 Marsu tinan ida ne’e, nia kumpre ona fulan neen too fulan Agostu 2014. Too ona fulan ne’en maibé seidauk iha akuzasaun ruma hasoru Mauk Moruk ho nia grupu, tanba tuir ami nia haree katak ejijénsia sira ne’ebé Mauk Moruk halo parte husi liberdade ba espresaun ne’ebé hatuur metin iha Timor-Leste nia konstituisaun no Paktu Internasionál direitus umanus ne’ebé estadu TL ratifika ona nudár lei doméstiku.

Ami hatene katak servisu Intelijénsia Nasionál nia fó sala informasaun ba Polítiku sira tanba ne’e foti desizaun ba kaptura Mauk Moruk no operasaun konjunta hasoru nia grupu laiha rezultadu real tanba la kaptura kilat sira ne’ebé Intelijénsia sira informa ba estadu. Ami hatene katak laiha kilat iha grupu sira ne’ebé lidera husi Mauk Moruk no sira laiha intensaun atu estraga estabilidade iha Timor-Leste.

Mauk Moruk nia kaben no oan sira moris mizeria iha Olanda tanba sente falta aman nia prezensa iha sira nia sorin hodi sustenta alimentasaun ba nesesidade familiar no tau matan ba oan sira nia eskola. Ohin loron Mauk Moruk nia kaben no oan terus iha ema nia rai mesak, Mauk tenke kumpre forsadu ba dezisaun estadu nian ne'ebe laiha akuzasaun formal.

Tanba ne’e hanesan Timor-oan no jerasaun foun ne’ebé preokupa ho kazu Mauk Moruk nia, husu ba Exelénsia atu tau matan mós ba lala’ok servisu lei no orden nia tanba ami haree funsionamentu justisa liu-liu ba investigasaun kazu Mauk Moruk nia la’o la sériu no la’o neineik loos.

Ba Exelénsia Prezidente Repúblika nia atensaun no konsiderasaun la haluha hato’o obrigadu barak

Evangelino Pereira Gusmão

Responsavel FEM