Tinan 23, Kery Laran Sabalae no Remigio Levi Tilman, seidauk fila uma

Foto: Maubere Gusmao, iha Santa Kruz

Tinan 23, Kery Laran Sabalae no Remigio Levi Tilman, seidauk fila uma

Hakerek na’in, membru Aliansa Nasional Timor-Leste ba tribunal Internasionál-A-N-T_I, membru ba movimentu estudante ba buka ema lakon forsadamente

Dia 30 Juñu, kompleta tinan 23, Kombatente na’in rua; Pedro Nunes, alias Kery Laran Sabalae no REMIGIO LEVI DA COSTA TILMAN ho naran funu “METAN ou IRAK”, lakon husi família no povu Timor-Leste, kada tinan, família sira halibur malu hodi hanoin hikas sira nia lakon, liu husi husu misa no kari ai-funan iha semitériu Santa krús. Ohin família sira husu no realiza misa iha igreja Bekora no kari ai-funan iha Krús boot- semitériu santa krús. Nudár tradisaun ema katólika sira nian, dala barak tau ai-funan no sunu lilin iha krús boot hodi hanoin hikas sira ne’ebé laiha rate inklui halakon forsadamente. Komemorasaun ne’e, partisipa husi família, kolega rezisténsia no ativista direitus umanus sira.

Komandante Sabalae no Remigio lakon hafoin kumpre misaun rezisténsia iha Ermera, tuir informasaun sira rua hetan kapturasaun no halakon dalan husi Ermera ba Dili. Bele hetan informasaun liu tan iha ne’e; http://forum-haksesuk.blogspot.com/2011/05/hanoin-hikas-remigio-metan.html no http://www.tatoli.tl/2017/07/keri-laran-sabalae-nia-istoria-luta/. Dezde lakon, too agora família no kompaneru da luta sira, nunka hatene sira rua nia paradeiru, maske sira buka, husu no konfirma, ate agora seidauk iha resposta ruma husi Indonézia ba aswain na’in rua ne’e nia destinasaun ikus.  

Lei humanitaria internasionál, ne’ebé Indonézia mós nudár membru, iha momentu halakon aswain na’in rua, bandu atu oho kombatente sira ne’ebé hetan kaptura ona ka hetan ona fraku durante batalla no asegura ema sivíl sira nia vida iha batalla ho forma saida de’it.  Eis Militár Indonézia no autoridade Indonézia nian, nunka kolabora ka la hatudu vontade hodi hatudu ema sira ne’ebé sira halakon no oho inklui la seidauk prontu atu hatudu kombatente na’in rua ne’e ba TL, maske rona katak iha esforsu husi lider sira Timor oan maibé husi esforsu ki’ik ne’ebé sira halo, seidauk too iha pontu sériu ida hodi fornese resposta ba família no ema sira ne’ebé hein. Timor-Leste nia lider no ukun na’in sira kontinua hakarak halo relasaun di’ak ho Indonézia duke buka ema sira ne’ebé temi iha leten.

Sabalae no Remigo nia lakon, nudár parte husi krime sériu sistemátiku ne’ebé militár Indonézia komete durante okupasaun ilegál iha ne’e ba tinan 24. Hafoin Timor-Leste manán batalla naruk husi Indonézia, ho tulun Nasoins Unidas nian, estabelese unidade ba krime sériu no panel espesiál ba krime grave ne’ebé hala’o mandatu iha tribunal distritál Dili. Tanba akuzadu sira hotu iha Indonézia nia territóriu, Indonézia nia resposta ba ejijénsia harii tribunal Internasionál, sira husu harii tribunal íbrida ida iha Jakarta hodi julga akuzadu sira, kriminozu kuaze hotu hasees an husi akontabilidade loloos tanba laiha vontade di’ak husi parte autoridade Indonézia nian. Nune’e, umanidade no ativista sira iha mundu kontinua ezije no hein mekanizmu internasionál ida ne’ebé iha kapasidade hodi investiga, akuza no julga akuzadu sira hodi hetan lia-loos no justisa ba povu no umanidade tomak.

Durante Novembru no Dezembru 2017, Komité Kontra Tortura, parte Konsellu Direitus Umanus Nasoins Unidas nian, simu relatóriu sira husi Timor-Leste inklui relatóriu husi Governu, sosiedade sivíl, Provedor dos Direitus Umanus no Justisa - PDHJ.  Observasaun konklusivu Komité nian-http://www.laohamutuk.org/Justice/UPR/CAT/ConcObs15Dec2017te.pdf inklui preokupasaun barak relasaun ho akuntabilidade ba krime kontra umanidade durante okupasaun militár Indonézia, Komité husu Timor-Leste atu permite ba reúne fali panel special Nasoins Unidas nian, atu kontinua prosesu judisiál ba krime sira.

Ativista ba direitus umanus no estudante sira balun, kontinua hein justisa ba povu TL no umanidade sira ne’ebé buka justisa no akontabilidade ba sira ne’ebé oho no halakon ona Timor oan sira durante periodu okupasaun ilegál.

Sujere mós ba jornalista sira, atu uza dokumentu observasaun konklusiva komité tortura Nasoins Unidas nian hodi konfirma ba parte sira ne’ebé iha autoridade. Sujere mós ba ativista sira, atu la husik leet de’it kestaun ida ne’e hodi luta ba nafatin, sujere mós ba ukun na’in sira, atu envezde de haluha kazu sira hanesan ne’e, di’ak liu ho korajen no aten barani hodi husu ba Indonézia hodi hamutuk hakotu tiha korrente impunidade no hametin ita nia estadu direitu ne’e ba oin.

Ba atensaun no kolaborasaun la haluha hato’o obrigadu, Bele hetan informasaun relevante iha ne'e; http://www.laohamutuk.org/Justice/JusticeIndex.html#InternationalCrimes

Celestino Gusmão

A Luta Sempre Kontinua!