Estadu nia pozisaun ba Kazu Emilia Pires no Mauk Moruk

Estadu nia pozisaun ba Kazu Emilia Pires no Mauk Moruk

Hakerek na’in Maun  Saky nia konta fb: https://web.facebook.com/carlos.slfrsaky, dia 3 Desember 2016

Foto husi internet

Sei matak iha ita nia ulun, maun Mauk-Moruk, eis-Komandante Brigada Vermelha FALINTIL, hamriik ko’alia, reprezenta lian sira ne’ebé ezije justisa ba ema hotu, hakilar kona-ba abuzu podér no korrupsaun ne’ebé buras iha ita nia rain. Tanba maun Mauk inkomoda ema barak ho ema boot sira, Estado ho tribunal, kaer nia soe tama iha kadeia ho razaun nia insita violénsia ka kria instabilidade. Ikus mai, nia sai husi kadeia no kontinua nia luta. Infelizmente dalan ne’ebé maun Mauk uza mak ladún los maibé ninia objetivu buka justisa, kombate abuzu podér ho korrupsaun sai luta ema hotu nian. Nu’udar konsekuénsia husi nia luta, nia tenke mate iha kilat tutun.

Molok nia mate, boot sira, halo apelo fila-fila atu maun Mauk-Moruk tenke koopera ho justisa ka tenke entrega-an hodi hasoru justisa. Apelo seidauk to’o, entaun sai ho tan rezolusaun husi PN ida ne’ebé buka mobiliza órgaun soberano sira hotu no povu Timor tomak hodi kaer no kastigu maun Mauk Moruk. Ikus mai maun Mauk-Moruk la rona martelu nia lian ne’ebé atu hakotu pena/kastigu tinan hira ba nia, maibé nia rona kilat nia lian ne’ebé hakotu nia moris rohan laek. 

Ohin loron, mana Emilia Pires, eis-Ministra Finansas, ne’ebé hetan ona akuzasaun husi Ministériu Públiku, halo partisipasaun ekonómika, ne’ebé tuir maun Mauk-Moruk nia liafuan karik, halo korrupsaun. Maibé to’o agora, ita la rona husi boot ruma nia ibun ne’ebé halo apelo atu husu mana Emilia Pires koopera ho justisa ka entrega-an ba justisa. Ita mós la hatene sei iha rezolusaun ruma hanesan ne’ebé hasai ba maun Mauk Moruk hodi kaer mana Emilia ka lae.

Ne’e so diabu sira de’it mak hatene. Los duni, mana Emilia Pires la kria instabilidade maibé nia dezafia Estado soberano Timor, dezakredita Tribunal, órgaun justisa Timor nian no símbolu husi ukun-rasik-an nian ida. Maibé ita la haree esforsu husi boot sira nian, husi Estado no Governu hodi lori fila mana Emilia Pires mai Timor hodi hasoru justisa no dignifika hikas supremasia ho autoridade justisa iha Timor-Leste. 

Maun Mauk-Moruk ema ida uluk funu ba ukun-an, terus ba ukun-a no nia família barak mate ba ukun-an. Iha ukun-an nia laran, nia la hetan pozisaun ruma, la hetan priviléjiu ho regalias ruma. Buat ne’ebé nia hetan mak Nia lori nia moris hodi sosa de’it justisa no luta hakarak hamoos KKN husi Timor hodi povu tomak bele hetan justisa no moris di’ak.

Maibé mana Emilia ne’ebé hetan pozisaun ona nudár membru Governu, hetan priviléjiu ho regalias oioin, to’o hetan alegasaun ho akuzasaun ona husi Ministériu Públiku kontinua reprezenta Estado to’o sees ba li’ur. Maun Mauk Estado ho governu duni, subar husi uma ba uma, ka husi ai-laran ida ba ai-laran seluk to’o tiru mate iha ai-laran, maski durante tinan barak nia mós luta no terus iha ai-laran.

Enkuantu mana Emilia ne’ebé iha kazu, Estadu no governu kontinua haruka ba reprezenta Estado, no toba no han di’ak husi Hotel luxuozu ida ba hotel luxuozu seluk, no ikus mai lakohi koopera ho justisa no hatún tan Tribunal Timor nia naran iha li’ur ne’ebá.

Nusa mak ema hirak ne’ebé hetan ona pozisaun, priviléjiu ho regalias oioin husi Estado lakohi kolabora ho justisa? Sera ke ema sira ne’e aas liu justisa? Ka sira moris iha justisa nia leten? Nusa mak to’o agora laiha apelu ruma husi boot sira husu mana Emilia Pires atu kolabora ho justisa? Ka boot sira mak proteje hela mana Emilia? Tempu mak sei hateten ba ita kona-ba buat hirak ne’e.