Família vítima, oan kiak no feto faluk hanoin hikas Masakre Setembru Negro

Família vítima, oan kiak no feto faluk hanoin hikas Masakre Setembru Negro -Tinan 18 liu ona laiha nafatin Justisa no Akuntabilidade - Impunidade kontinua prevalese

(Reflesaun badak hosi sobrevivente hosi Masakre Igreja Suai no ativista pro justisa ba krime pasadu)

06 Setembru 2017

Foto; google

Ohin 6 Setembru 2017 kompleta ona tinan 18 masakre Igreja Suai ne’ebé konsidera hanesan loron nakukun no loron triste ba faluk no oan kiak sira iha Suai Covalima. Ohin sein prezensa na’i ulun-governante sira nian, oan kiak, faluk, hamutuk famíliavítima sira ho fuan boot, oin kraik, nakonu ho triste lori ai-funan no lilin ba tau iha fatin akontesimentu, fatin masakre Setembru Negro hodi fóonra no valoriza sira ne’ebé fó sira-nia vida ba rai lulik ida ne’e.
Masakre Setembru ‘Negro’ milisia LAKSAUR no MAHIDI sira ne’ebé ho momoos kedas hetan apoiu husi MilitárIndonézia asalta no tiru ba igreja laran hodi hamate no halo violasaun seksuál hasoru ema inosente sira, feto no mane klosan maizumenus ema na’in 30 to 200 inklui Amu Lulik na’in tolu, ne’ebé mate, lakon no balu to’o agora la hatene sira nia paradeiru. Triste maibé ida ne’e mak akontese, triste maibé ida ne’e mak realidade, realidade ema hotu hatene katak sira ne’ebé mate no lakon la’ós tanba sira-no sira-nia família nia interese maibé tanba interese no prinsípiu ida atu termina Timor oan nia sofrimentu hosi okupasaun illegal militár Indonézia nian iha Timor-Leste. 

Masakre Setembru ‘Negro’ liu-ona dekade ida resin, maibé família vítima, oan kiak no feto faluk sira sente katak Governu tau sees no koko atu haluha tiha sofrimentu no terus ne’ebé sira hasoru. família vítima sente laiha justisa no iha akuntabildade ba krime ne’ebé kriminozu sira komete ona, ikus impunidade kontinua prevalese. Liuliu bainhira ami haree no rona lideransa famozu balu mak ba hakbesik aan ba autór prinsipál balu hanesan akuzadu eis Jeneral Wiranto nune’e mós lideransa sira ne’ebé halo intervensaun ba Tribunal nia servisu hodi liberta eis komandante Milisia Laksaur Maternus Bere iha tinan sira hirak liu ba, piórliután mak Governu no Parlamentu Nasional hasai rezolusaun hodi duni sai juis internasionál sira hodi fóimpaktu ba prosesu julgamentu ba kazu krime grave sira. Ami triste! Tanba lideransa sira koko atu tau sees no haluha krime sira ne’ebé akontese iha pasadu.

Maske nune’e, ami oan kiak, faluk, vítima no família vítima nafatin ezije ba Estadu Timor-Leste, atu valoriza sofrimentu no terus ne’ebé vítima no família sira hetan liuhosi dalan reparasaun no prosesu legál hasoru autór sira ne’ebé involve iha masakre Igreja Ave Maria Suai.

Ami vítima no família vítima mós lamenta ba Estadu Timor-Leste ne’ebé iha realidade taka matan ba ami nia terus no susar iha tempu pasadu hodi tau sees tiha justisa ba krime pasadu ho razaun katak povu iha jerál, vítima no família vítima partikulármente la ezije ona justisa ba sira nia sofrimentu ka violentu ne’ebé sira hasoru iha pasadu durante okupasaun Indonézia iha tinan 24 nia laran.

Ami, vítima no família vítima sira konsiente katak dezenvolvimentu infra-estrutura fíziku ba estrada, edukasaun, saúde, agrikultura ne’e importante ba prosesu atu transforma povu husi kiak no mukit ba povu ne’ebé prósperu (sejahtera), maibé prosesu sira ne’e hotu la signifika atu ignora tiha justisa ba krime pasadu, nu’udar parte integradu husi prosesu luta no sofrimentu povu nian.

Tanba ne’e ami vítima no família vítima kontinua ezije ba Governu no Parlamentu foun atu fó prioridade ba ami ninia ejijénsia ne’ebé durante ne’e ami ezijebeibeik hodi bele hetan justisa no prosesu akuntabilidade ba krime ne’ebé akontese iha Timor laran tomak liu-liu masakre Setembru ‘Negro’ Igreja Ave Maria Suai.

Sovrevivente no vítima sira liu husi komemorasaun ida ne’ hakarak bolu atensaun ba estadu Indonézia atu labele nega buat ne’ebé sira nia obrigasaun tenke halo, ida ne’e mak tenke hahú prosesa kazu krime grave iha Timor-Leste, Papua, kazu 65 no sira seluk durante rejime ditadórSuharto nian.

Ami mós apela ba Nasoins Unidas liu husi ninia órgaun relevante sira atu tau la husik agenda krime grave hodi kontinua dudu ba oin, nune’e de’it mak ita bele garantia hakotu impunidade no labele repete tan krime kontra umanidade iha futuru. Impaktu husi impunidade hatudu daudaun hela, ami nia rain post Indonézia, hasoru krime 2006, hasoru oho malu iha 2014-2015 ne’ebé Mauk Moruk ho nia maluk sira hetan oho, iha Papua osidentál kada loron ema mate no hetan torturasaun no tratamentu desumanu.

Ami hanoin katak krime ida ne’e nudár krime internasionál no luta ba hakotu impunidade sai tiha ona nudár luta global ida iha mundu rai-klaran. Tanba ida ne’e prosesamentu kriminál tenke iha nivel internasionál ida ne’ebé justu no kredivel. Ami hanoin mós katak Timor-Leste mak tenke inisia nudár estadu soberania ida maibé la justu kuandu husik krime internasionál ida ne’e husik de’it estadu Timor-Leste mak lori.

A Luta Kontinua

Sobrevivente, ativista no vítima sira husi masakre Igreja Suai Covalima. Bele konfirma ba Jose Moniz;  josem@jsmp.tl +67077402231