DESKULPA RATE-LAEK! Dadolin Murak Deskulpa! ami seidauk bele halibur imi ruin ami seidauk bele hamaluk imi klamar tan ami lian mamar liu hasoru Liman-Kroat sira ne’ebé hakotu imi nia moris imi ruin no klamar sei namkári iha rai-fehan, foho no tasi-okos Deskulpa Rate-laek! ami seidauk bele tane loloos folin husi imi nia terus no mate tan ami sei hanoin liu atu hamahar ami nia bolsu tan ami sei susar lolo liman ba malu ami balun sei sai nafatin ATAN tan la brani hateten ‘LAE’ hasoru injustisa Deskulpa Rate-laek! kapitalista tasi-balun no ami balun de’it mak susu dadaun rikusoin rai-lulik ne’ebé imi saran an ba ami balun dulas lei ba-mai hodi serbí grupu kikoan nia interese Deskulpa Rate-laek! fó netik imi nia iis mai atu ami bele hamriik fali iha ami nia ain rasik hodi la tane liman ba tasi-balun harii fali ami nia knua haburas fali ami nia to’os Deskulpa Rate-laek! loke fali ami neon atu komemorasaun hirak ne’e...
